Ne Me Quitte Pas...

Ne Me Quitte Pas

امنلي بيت,مطرح منك ساكن...

رايح اجيب الديب من ديله...

ليله حب...

مش عارف ليه دايما كنت بحس ان اغنيه ليله حب بتاعه ام كلثوم,اغنيه بتتكلم عن الموت,عمري ما قدرت احس انها بتكلم فيها حبيبها عشان ييجي,دايما كنت بتخيلها بتنادي الموت عشان اتاخر,بتناديه عشان ييجي و يطلقها بعيد,اللي زود الاحساس ده عندي حقيقه اني دي اخر اغنيه تغنيها في حفله,غنتها في اخر حفله ليها اول سنه 73,لما بسمعها بحب اسمع اول و اخر حتتين فيها,لانهم هما اللي بحس فيهم بكده
مطلعها بيقول
ياللي عمرك ما خلفت معاد في عمرك
الليله دي غبت ليه حيرني امرك
اخرك ايه عني
مستحيل الدنيا عني تأخرك
بالامل مستني
سهران تجيني يا حياتي و اسهرك
تعالي
تعالي
حب العمر كله نخلصه حب الليله دي
تعالي
تعالي
شوق العمر كله نعيشه مالقلب الليله دي
متخليش اشواقنا لبكره
متخليش فرحتنا لبكره
كأن اول ليله للحب الليله دي
و اخرها بيقول
و الليله دي
يا حياه روحي جينا في نفس المكان
جيت انا و شوقي و قلبي و الحنان
جينا نستناك
جينا نترجاك
جينا نفرش بالامل سكه خطاك
و مهما غبت عليا
حتجيني بعد شويه
اخد ايديك في ايديا
و احضن عينيك بعينيا
و نعيشها ليله عمر
ليله عمر
كل عمر
عمر الدنيا
عمرها ما وصلتني انه حبيب,دايما كان بيبقي الموت,بارد و لذيذ,احلي من اي حب,اوفي من اي حبيب...

ميلودراما...

غريب اوي ان الواحد بيعدي بمواقف سينمائيه و تلفزيونيه متوحشه,و لا بيحس بأي حاجه خالص من اللي بيحسوها بتوع التليفزيون,و لا اي رد فعل نهائي,يمكن عشان الواحد مشافش التتر اللي قبل الحلقه,و لا قرا الاسماء,غريبه برده ان الواحد بقي حاسس انه يقدر يمثل احسن من العالم الممثلاتيه دول كلهم,و من غير ما يمثل...

الليله دي...

حاليا في دار سوسن...

http://motatale3on.blogspot.com/

علمتونا يا بيي...

من مسرحيه اخر ايام سقراط...


Get your own Box.net widget and share anywhere!

يا تري ح...

يا تري حقدر احس ان مساحه الحريه المتاحه ليا,اكبر بشويه من حجم الهوا اللي جوا صدري.
يا تري حشوف بعيني ابعد شويه من قزاز النضاره.
يا تري حسمع صوت غير صوتي طول اليوم.
حمسك حاجه غير الهوا و حباله اللي مالها اخر.
حكون بني ادم غيري,غير كل الحاجات اللي عايز اغيرها فيا,حقدر اكون واحد علي ميه من اللي نفسي اكونه,حغير حاجات مينفعش تتغير,حوقع اصنام مقدرش اتخيل اني حوقعها,حطوح كل اللي مش عاجبني لبعيد,و مشوفوش تاني,حقول كلام كان نفسي اقوله من زمان و محبوس فيا,لا عارف اطيره و لا قادر ارتاح و هو جوايا,حشوف الدنيا احسن و الناس اطيب,يا تري ح.........

Milord...

اديث بياف,بحس ان الست دي سخريه العالم كله اتجمعت فيها,و هي بتغني بحس كانها بتطلع لسانها للدنيا و بتقولها طز فيكي,و لا يهمني منك,اعملي اللي تعمليه و انا حعمل اللي اعمله و نشوف مين فينا حيكسب.
برغم اني مش بفهم كتير فرنساوي,و بالذات لما بيتغني,بس بحس ان كل كلمه بتقولها انا حاسسها,و الموضوع ده اتأكد عندي لما شفت ليها فيديوهات في يو تيوب,بجد هي صاحبه فلسفه خاصه,دماغ غريبه,شايفه الدنيا علي حقيقتها,و قد ايه هي متستاهلش كل الاهتمام ده,معرفش ده اللي بتقوله فعلا و لا لأ بس ده اللي وصلي.
يوم ما طلعت النتيجه السنه دي,لقيت نفسي لوحدي بشغل اغانيها,ساعتين ورا بعض يمكن مش بسمع غير اديث بياف,حسيت و انا بسمع اني بطلع لساني لأي حاجه ممكن تضايقني,و انه مفيش حاجه احسن و لا الذ من اني ابقي مرتاح و مبسوط مهما الدنيا تضرب تقلب,مشكورين يا ست اديث علي فلسفتك الجامده.

عن دلع النسوان و احزمه الامان و المارلبورو...

ساعات بتخيل انه لما حروح انام,حصحي الاقي نفسي في مكان تاني خالص,و الاقيني اكبر ب خمستاشر او عشرين سنه,و اكتشف بقي اني فقدت الذاكره و عشت حياه تانيه خالص و انها فجاه رجعتلي,طبعا لما بفكر شويه بكتشف ان ده مش بيحصل غير في الافلام و المسلسلات العربي الخايبه,بس لذيذ قوي انه يحصل في الحقيقه,ان الواحد يبقي ليه حياه جديده من غير ما يعيش الفتره اللي بين الحياتين,اللي لازم يقعد يعيش فيها كل لحظه و كل تغيير,لعل و عسي.
من فتره مش قصيره,كنت بحلم حلم بيتكرر كتير,اكون راكب مع حد في عربيه,او في ميني باص و ماشيين فوق كوبري,و فجاه العربيه تنط من فوق الكوبري,و افكر وقتها بقي حيحصلي ايه لما العربيه تقع,ساعات كان الكوبري ده بيعدي علي النيل,و بالتالي كنت بفكر,يا تري حغرق و لا حعرف افتح باب العربيه و اعوم,مفتكرش عمري كملت الحلم ده لأخره,بس كل ما بعدي فوق كوبري,بييجي في دماغي الخاطر ده,و عشان كده بكره قوي الكباري...
من اسبوع كنت بحضر عمليه,قبل الجراحه نفسها دكاتره التخدير كانوا بيركبوا سينترال لاين في وريد في رجل المريضه,و المريضه بقي عماله تصوت,و هما طبعا و لا هنا,و الممرضين بيضحكوا و الدنيا وردي,في الاول انا قلت في دماغي,ده دلع نسوان,عادي يعني ماهو اي ست حتصوت سواء حاسه بوجع و لا لأ,بس فكرت شويه,ممممممم,المريضه دي خدت علاج كيماوي و اشعاعي عشان كان عندها سرطان في الثدي,فمش حتعدي كل ده و تيجي تصوت من شكه ابره,كمان بفرض بتتدلع,ما هي اكيد متوتره عشان حيتعمل فيها عمليه بعد شويه,يا تري بعد سنين قليله انشاءالله,لما اتحط في موقف شبه ده,حقول للعيان متقلقش دي حاجه بسيطه,و لا حكمل تركيب و اسد ودني و اقول ده دلع نسوان.
لما حد من صحابي اللي بيدخنوا بيدخن قدامي,و يكون عارف اني مش بدخن و يعزم عليا في حركه رخامه,بيبقي هاين عليا اقوم واخد كام سجاره من اللي معاه,كذا مره احس انه لازم اشرب و لو واحده,المشكله بقي ان ريحه السجاير بتتعبني و انا اصلا عندي الربو,يعني لو شربت يبقي بموت نفسي,بس مش عايز احس ان فيه حاجه ممنوعه عني,عايز احس اني اقدر اعمل كل حاجه,لأنه للاسف مبقاش فيه حاجه اصلا تتعمل,تلاكيك يعني...

تهبيلات مع النفس...

كل اللي قدمته للعالم لحد دلوقت,كميه كبيره من النوايا الحسنه,الحياه مفيده جدا...

ياي يا ليالي الصيف...

الاغنيه دي بيغنيها شفيق جلال في فيلم شفيقه و متولي,قعدت ادور عليها كتير و اخيرا لقتها في منتدي سماعي,اغنيه تحفه...


Get your own Box.net widget and share anywhere!

Differential Equations...

Me - You = Lost

Me + You = Never Happened

Me - All = Total Peace

All - Me = All

Me + Time = Same Me

امبارح كان عمري واحد و عشرين...

كنت في سيرتك امبارح...

الاجازه بدأت,اخيرا حيبدأ الوقت يبقي ليه معني...

Maslow Hierarchy Of Needs...

No Comment...

مواطنه...

فعلا,نفسي اتعلم يبقي ليا وطن.
بمشي في الشوارع,بقعد في الكليه,بتفرج علي التليفزيون,و عمري ما بقيت حاسس ان ليا وطن,مصر بقت مجرد شقه,عايش فيها انا و غيري,بقت مجرد مكان للسكن.
بشوف العلم,و مش بحس بأي حاجه,و لا بحب الوانه,و لا بكره الوانه,ايام كاس افريقيا كان لذيذ,لكن برده,عمري ما حبيته.
بشوف الاجانب,بيحبوا قوي العلم بتاعهم,بيحبوا الوانه,بشوفهم بيرددوا النشيد الوطني,بيغنوا النشيد الوطني,بتملاني الغيره.
النشيد الوطني لمصر جميل,لكن مبقتش احس معاه انه نشيدي,اني اقدر اغنيه,بعد ما قلته الف مره في طابور المدرسه,مبقاش يعني ليا اكتر من لحظه الطابور.
نفسي ارجع احس النشيد,و اشوف العلم,و اتعلم يكون ليا وطن.

اخر الشهر...

3 ساعات بعد الضهر,4 ساعات بالليل,ساعتين بعد الضهر,ساعتين و نص بالليل,4 ساعات بعد الضهر,........

نوم متقطع,راوند الاطفال راوند سئ,جدا,فكرني بايام التربيه العسكريه و الايام اللي كانت بتضيع بلا جدوي,غير انه بس لازم اصحي الصبح و انزل اعمل حاجه بكرهها,عشان لازم اعملها من اجل ان تسير المركب.

شرح زفت,مفيش عيانين عشان النايب السينيور راح يخدم مصر في رمال صحراء السلوم,راح الجيش يعني,و فضلت النايبه اللي لسه متعينه و مش عارفه تجيبلنا عيانين نشوف عندهم ايه و نكشف عليهم,اكيد اللي حيبقي عنده راوند اطفال السنه الجايه اخر شهر,حيرجع يكشف تاني.

مزاجي زفت من قله النوم,ايام الاجازه القليله في ابريل زي عيد تحرير سينا و شم النسيم,قضيتها كلها نوم,و برده بيفضل مزاجي زفت,مبقتش قادر استمتع و انا بسمع ام كلثوم,و لا و انا بقرا مدونه حلوه,و لا و انا بلعب جيم بحبه,و لا و انا بعمل اي حاجه,مجرد صاحي عشان مستني انام تاني,و مستني يخلص راوند الاطفال.

استنينا مكتوبك و ما جاناشي,و القلب و الله لما حبك ما جناشي,اخيرا اغنيه عدلتلي مزاجي شويه,سمعتها علي نجوم اف ام و انا راجع من الكليه امبارح,و نزلتها لما روحت,يا من هواه من البوم هشام عباس بتاع ناري نارين,الجمله دي جامده و عجبتني,بالذات حكايه جاناشي دي.

حضرت النهارده حفله عاملينها قسم اتصالات في هندسه القاهره بمناسبه تخرجهم,حضرت طبعا ساعه واحده بس عشان المفروض اني طالب طب شاطر و نجيب,لازم يروح عشان ينام عشان يصحي يحاول يذاكر,الامتحان بقي قرب و كل سنه و انا بخير,الناس في الحفله كانوا مقضيينها تصوير,كل دقيقه صور صور,عشان الذكريات الحلوه و اللذي منه,انا مش فاكر اني اتصورت في الكليه في موقف مشابه غير مره واحده,و كنت بقول لنفسي ايه الهبل ده,فضا بعيد عنك,بس لما شفتهم النهارده في هندسه فهمت انهم بيعملوا كده عشان خلاص,حيفرجوا عنهم من السيرك الصغير للسيرك الكبير,و كل واحد محتاج شويه ذكريات للايام الجميله اللي قضاها مع ناس ممكن ميشوفهمش تاني,بالنسبه لي,لسالنا كتييييييييييير علي بال ما نفكر في الموضوع ده,يعني زي ما قلت,فضا بعيد عنك.

اديث بياف,عمال انزل ليها اغاني,اكتشفت ان الست دي رهيبه,مغنيه رهيبه,من احسن الحاجات اللي حصلتلي الشهرين اللي فاتوا اني بقيت بسمعها,صوتها فيه حشرجه لا تملك امامها الا انك تقول,الله يا ست.

الطلبه كلهم معترضين علي اننا حنخلص السنه دي اخر شهر 6,كل الناس فجأه بقي نفسها و مني عينها نخلص نص سبعه زي كل سنه,"مفيش وقت نذاكر,ياي فعلا كليه ياي,حرام عليهم كده بجد,عايزين نذاكر",نفس الناس دي كل سنه بتقول "ياي ياي,الكليه الشريره بتخلينا نخلص متأخر,كده مش بناخد اجازه",الناس بقت مدمنه تقريبا,و المذاكره و الامتحانات بقت كيف و مزاج,يعني لما تعوز تعاقب طالب,تحطه في اجازه اسبوعين,تلاقيه بتجيله اعراض انسحاب و يجري يدور علي كتاب يذاكر فيه,و لو ملقاش يقد بقي يهرش و يجيله هستيريا,عايز كتاب,عايز كتاب,و حياه ابوك كتاب,الحمد لله الكليه بقت ماسكه علينا ذله و محدش يقدر يفلفص و الا حيقطعوا عنه الجرعه اليوميه.

اخر ابريل,مكنتش متوقع ان اخر يوم في ابريل حقضيه و انا عايز انام,مجرد عايز انام,و كالعاده حفوق الساعه 3 فجرا,فاقضي ساعه اعوض فيها اللي فاتني طول اليوم,و اصحي تعبان,و هلم جرا,يبدأ مايو زي ما عدي ابريل,و اكتب بوست تاني علي اخر مايو,اوصف فيه قله النوم و قرف الامتحانات.

ايها الساقي...

موشح اندلسي مبدع,لشاعر اندلسي هو ابن زهر,واحد من اجمل ما قرأت

أيها الساقي إليك المشتكى قد دعوناك وإن لم تسمع

ونديم همت في غرته

ويشرب الراح من راحته

كلما أستيقظ من سكرته

جذب الكأس إليه وأتكى وسقاني أربعا في أربع

ما لعيني عشيت بالنظر

أنكرت بعدك ضوء القمر

وإذا ما شئت فاسمع خبري

عشيت عيناي من طول البكا وبكى بعضي على بعضي معي

غصن بان مال من حيث ألتوى

بات من يهواه من فرط الجوى

خفق الأحشاء مرهون القوى

كلما فكر في البين بكى ويحه يبكى لما لم يقع

ليس لي صبر ولا لي جلد

يالقومي عذلوا وأجتهدوا

أنكروا شكواي مما أجد

مثل حالي حقه أن يشتكي كمد اليأس وذل الطمع

كبد حري ودمه يكف

يذرف الدمع ولا ينذرف

ايها المعرض عما أصف

قد نما حبي بقلبي وزكا لا تقل في الحب أني مدعي

الموشح ده نفسي اسمعه ملحن و مغني,كنت قريت في موقع انه مسجل بصوت مطربه اسمها فاديه الحجي,و اللي كتب قال انها غنيت بطريقه بديعه,لكن للاسف مسمعتش التسجيل,اتمني اسمعه في يوم.

و عارض الموشح ده محيي الدين بن عربي بموشح مكفر,و الموشح المكفر كان بيبقي عن فكره صوفيه,و بيكون علي نفس وزن و قافيه الموشح المعارض,و ده كان من النصوص المقرره علينا في تانيه ثانوي,و من النصوص النادره اللي حبيتها من مختارات الوزاره الممله,كنت بحب قوي الموشح ده وقتها.

عندما لاح لعيني المتكا ذبت شوقا للذي كن معي

ايها البيت العتيق المشرف

جاءك العبد الضعيف المسرف

عينه بالدمع دوما تذرف

فرية منه و مكر فالبكا ليس محمودا اذا لم ينفع

ايها الساقي اسقني لا تاتل

فلقد اتعب فكري عذلي

و لقد انشده ما قيل لي

ايها الساقي اليك المشتكي ضاعت الشكوي اذا لم تنفع.

فؤاد عبد المجيد,الملحن العظيم,اعاد تقديم عدد كبير من الموشحات و القصائد القديمه,و رقصت عليها فرقه رضا,اذكر منها عجبا لغزال و يا غريب الدار,الراجل ده كان عظيم,الله يرحمه بقي,و يمكن ييجي حد تاني يعيد احياء الفن ده مره تانيه.

حلم...

فناما في سلام,و انتهي الزمن عند ذلك.

كلام في القلب...

مش محتاج اقول ان نورهان اللي شفتها النهارده في راوند الاطفال في ابو الريش,هي اعسل طفله شفتها في حياتي,عشان فعلا نورهان اكتر بنوته عسوله شفتها في حياتي.
ادعولها يا جماعه ربنا يشفيها و عمليتها تنجح.

دفا ابريل...

فيه اغاني بتدفي,مش اغاني دافيه,بتدفي,و فيه اصوات بتدفي برده,صوت اصاله في اغنيه "نسيني بيك" بيدفي قوي,حبيت بس اقول كده,اصبح علي خير بقي.

تاج من ارتعاشات...

سبحان الله,يوم ما عملت اول تاج ليا,بعتلي الاخ ارتعاشات شويه تاجات مش تاج واحد,و مطلوب مني احفر شويه في دماغي و الاقي اجابات لكل الاسئله دي,ربنا يسهل.

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها.

زمان قوي,لحد اولي كليه,كنت بحب قوي اقرا,و بندمج ساعات في روايه او كتاب يعجبني,و بعد ما انشغلت في الكليه,و بقيت بقرا فيها اللي يكفيني سنين طويله,بقيت بحب قوي اسمع مزيكا,فيه اغاني معينه بتخليني اركز معاها و انفصل شويه عن الواقع,اظن معظمها لمروان خوري,فيروز و أم كلثوم,بس برده صعب اعتبر المزيكا هوايه,اكتر من انها حاجه بحب تبقي معايا طول الوقت.

هل مقدار سعادتك أو شعورك ايا كان- عند تمرير التاج لك- يختلف حسب المدون الذي يمرر لك التاج؟

هو باعتبار ان محدش تاجني قبل كده,فمجربتش شعور مختلف عن التاج ده,بس عموما التاج ده مبعوتلي من ارتعاشات باشا,فاكيد انا سعيد جدا انه افتكرني بالتاج ده.

هل ترى للتاج أهمية حقيقية؟

اكيييد,بحس انه فرصه كبيره افهم بيها شخصيه ناس كتير من خلال اجاباتهم,خصوصا اني بحب افهمهم من خلال كتاباتهم,كمان بيخليني افتكر احداث و مواقف معينه و انا بجاوب,حسب السؤال يعني.

هل فكرت في عمل تاج خاص لك من قبل؟

لسه عامله يوم ما جالي التاج ده,سبحان الله يعني.

هل تفضل قراءة اجوبة التاج عند المدونين الاخرين؟ أم لا تهتم سوى بالتدوينات الأخرى فقط؟

اكيد,عشان اعرف الناس التانيه بتفكر ازاي,و ايه هي اجاباتهم علي نفس الاسئله اللي انا جاوبتها.

عندما ترد على التاج ما الذي تراعيه اكثر؟

مممممم,اجاوب بصدق,بس اصلا مش بحاول اراعي اي حاجه قوي و انا بجاوب,التلقائيه احسن حاجه.

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

ما قلنا ايوه عشان اعرف بيفكروا ازاي.

هل تلتزم حرفيا بأسئلة التاج ؟

نسبيا.

ما هي نوعية التاجات التي تفضلها؟

اخضر و باستك من فوق,هو ايه اللي نوعيه التاجات.

هل كنت طالب شاطر فى المدرسة ؟

:p ايوة,كنت دايما بطلع الاول

إيه أكتر مادة حبيتها في المدرسة والكلية؟

في المدرسه,الرياضه و كل فروع العلوم,بالذات الفيزيا.

في الكليه,الاناتومي(التشريح),الكيميا,الميكروبيولوجي(علم البكتيريا و الفيروسات),الفارما(علم الادويه),الجراحه و القلب في الباطنه.

إيه أكتر مادة كرهتها في المدرسة والكلية؟

في المدرسه,القراءه و القصه في العربي,كنت بكره العربي بسببهم,و الاقتصاد في تالته ثانوي,و كمان كرهت الرسم في اعدادي عشان كان بيتضاف علي المجموع,و المدرس كان بيخلينا نرسم حاجات غريبه و خنيقه.

في الكليه مش كتير,بس طبعا اول حاجه طب المجتمع,بكرهه جدا,غير كده مفيش ماده بكرهها قوي,بس يعني مش بستطلف لا النسا و لا الانف و الاذن.

كنت عايز تطلع إيه وأنت صغنن؟

هباب دكتور,و الحمد لله ربنا ابتلاني و حققلي امنيتي.

بس كده,انا جبت اخري و التاج خلص,احب امرره لوائل و محمود عزت,اشرب يا وائل.

.مـــــــــــاذا لـــــوووو....حــــرف شـــعـــلــقــه في الجــــووووو...

تــاج للزمـن

التاج ده اول تاج اعمله يا ناس...اول تاج....و عايزين نستفتح.....

ابتدينا بقى

لو تقدر ترجع الزمن مره واحده,تعمل

undo

لموقف ما,ايه الموقف اللي حتختار تشطبه من حياتك؟

**

لو معاك طاقيه الاخفا,حتعمل بيها ايه؟

**

لو تقدر ترجع بالزمن ليوم واحد بس,لاي وقت او يوم,ترجع لامتي و فين؟

**

لو معاك مصباح علاء الدين,ايه التلات طلبات اللي حتطلبها من الجني؟

**

لو تقدر تعيش في شخصيه تانيه ليوم واحد,او حتى علي طول,تحب تعيش بدل مين؟

**

سؤال شبه الاولاني,نفس قدره ترجيع الزمن,حاجه حتعملها و انت مش قادر تعملها و خايف من النتيجه بتاعتها,معاك

القدره دي,فتقدر تعمل الحاجه دي و لو فشلت ببساطه تعمل ليها

undo

و يا دار ما دخلك شر,ايه هي الحاجه دي؟

*******

التاج خلص,احب امرره

وائل

ارتعاشات

محمود عزت

نبيذ

.

و بطعم المانجه و كمنجه...

لو سألوني لو حبيت ابقي اله موسيقيه ابقي ايه,حقول علي طول,كمنجه.

طول عمري بعشق صوت الكمان,اي اغنيه فيها تقسيمه كمنجه احبها علي طول,صوت الكمان اجمل من انه ميتحبش,فيه حزن غريب,و امل غريب برده,أله اسطوريه.

واحده من اجمل تقسيمات الكمان الشرقيه,سمعتها في اغنيه أغدا القاك,لأم كلثوم,معرفش مين الفنان اللي كان بيعزف,بس غالبا كان اسمه حسن حفناوي,الراجل ده كان عظيم.

برده من اجمل الكمان اللي سمعتها,كمان كلود شلهوب في قصر الشوق,النسخه اللي من غير كلام,مزيكا بس,لحن مروان خوري,البيانو في الخلفيه,خلطه مزيكه بنت لذينه.

انشاءالله بفكر في يوم من الايام اخد دروس كمان,بس لما اخلص من الكليه و الامتحانات الاول,و يبقي عندي وقت شويه,نفسي اجرب احساس اني اطلع الموسيقي دي بنفسي,مش بس اسمعها.

حسيبكم مع مجموعه كمانات ححملها انشاءالله علي التوبيك ده.

و تحياتي للكمان.

حكم علينا الهوي...

النهارده اكتشفت اكتشاف مذهل بالنسبه لي,و باعتباري بقيت في الفتره الاخيره من عشاق ام كلثوم,و فان جامد قوي,اكتشفت ليها اخر اغنيه سجلتها,و مغنتهاش في حفلات,مكنتش اعرف اصلا الموضوع ده.

الاغنيه الحان بليغ حمدي,الكلمات مش فاكر لمين بس خمنت انها لاحمد رامي,الاغنيه صوتها فيها باين انه مرهق جدا,بس لسه فيه رنه ام كلثوم,سلطنتها,قوتها,المزيكا كعاده بليغ حمدي,قمه الدلع,و هي بتغني و انا مستغرب,الرزانه دي مع المزيكا دي,حته كومبينيشن ابن لذينا.

حكم علينا الهوي,نعشق سوا يا عين,و احنا اللي قبل الهوي,شوف كنت فين و انا فين

كنت مفتقد قوي لصوت تسقيف الجمهور اللي متعود اسمعه في تسجيلات الحفلات,التسقيف كان بيدي الاغنيه طعم,فيه تفاعل جامد قوي,و كنت بحس انه الحاجه اللي بتخلي ام كلثوم تكمل غنا بسلطنه,لما يطلع صوت سميع يقول,عظمه علي عظمه يا ست.
اجمل حاجه في الدنيا ان الواحد يعمل حاجه و الناس يفضلوا فاكرينها بعد ما يموت بسنين,و الاجمل ان ناس مكانوش عايشين الفتره دي اصلا يفتكروا البني ادم ده,الله يرحمك يا ست و شكرا علي المزاج اللي بتمزجه لما بسمعلك.

http://songs.mazikana.com/Songs/U/Um-Kalthom/mp3/Collection/Mazikana_Um_Kalthom---Hakam-Alena-El-Hawa.mp3

يا شوق...

حكيوا العاشقين,عنك طول السنين,قالوا مليانه حنين,همساتك يا شوق...

يا شوق,بتفكرني الاغنيه دي بيوم دافي و مشمس في شهر مارس من خمس سنين,كانت اول مره اسمع الاغنيه دي,نزلتها من علي النت,من موقع مزيكا ايام ما كان الموقع الوحيد اللي بينزل اغاني,و سمعتها يومها حاجه و خمسين مره,اتجننت بيها.

الاغنيه دي كانت بدايه معرفتي بمروان خوري,اللي اصبح المطرب و الشاعر و الملحن المفضل ليا فيما بعد,الاغنيه جننتني ساعتها,و هي الاغنيه الوحيده اللي اتصلت فيها بقناه ميلودي عشان اطلب تتذاع,كنت مهووس بيها.

كل ما بسمعها بفتكر الايام دي,في مارس من خمس سنين,كنت في سنه اولي كليه,و مكانش الواحد لسه اتشغل و لا حاجه,الاغنيه بتجيبلي ذكريات جميله.

ضايع بين ده و ده,قالوا عنك انت كده,و لا يوم سامعلي ندا,سامعني يا شوق؟؟...

فضل مروان خوري من يومها اهم مطرب عندي,و ذوقي اتغير كتير من يومها برده,من بعد الاغاني السريعه,بقيت بسمع اغاني اهدا كتير.

شكرا مروان خوري علي اوقات كتير سمعتك فيها و ظبطتلي مزاجي,و شكرا "يا شوق" علي انك كل مره اسمعك بفتكر ايام زمان,و نهارات مارس اللي بتبقي دفا ساعات.