3 ساعات بعد الضهر,4 ساعات بالليل,ساعتين بعد الضهر,ساعتين و نص بالليل,4 ساعات بعد الضهر,........
نوم متقطع,راوند الاطفال راوند سئ,جدا,فكرني بايام التربيه العسكريه و الايام اللي كانت بتضيع بلا جدوي,غير انه بس لازم اصحي الصبح و انزل اعمل حاجه بكرهها,عشان لازم اعملها من اجل ان تسير المركب.
شرح زفت,مفيش عيانين عشان النايب السينيور راح يخدم مصر في رمال صحراء السلوم,راح الجيش يعني,و فضلت النايبه اللي لسه متعينه و مش عارفه تجيبلنا عيانين نشوف عندهم ايه و نكشف عليهم,اكيد اللي حيبقي عنده راوند اطفال السنه الجايه اخر شهر,حيرجع يكشف تاني.
مزاجي زفت من قله النوم,ايام الاجازه القليله في ابريل زي عيد تحرير سينا و شم النسيم,قضيتها كلها نوم,و برده بيفضل مزاجي زفت,مبقتش قادر استمتع و انا بسمع ام كلثوم,و لا و انا بقرا مدونه حلوه,و لا و انا بلعب جيم بحبه,و لا و انا بعمل اي حاجه,مجرد صاحي عشان مستني انام تاني,و مستني يخلص راوند الاطفال.
استنينا مكتوبك و ما جاناشي,و القلب و الله لما حبك ما جناشي,اخيرا اغنيه عدلتلي مزاجي شويه,سمعتها علي نجوم اف ام و انا راجع من الكليه امبارح,و نزلتها لما روحت,يا من هواه من البوم هشام عباس بتاع ناري نارين,الجمله دي جامده و عجبتني,بالذات حكايه جاناشي دي.
حضرت النهارده حفله عاملينها قسم اتصالات في هندسه القاهره بمناسبه تخرجهم,حضرت طبعا ساعه واحده بس عشان المفروض اني طالب طب شاطر و نجيب,لازم يروح عشان ينام عشان يصحي يحاول يذاكر,الامتحان بقي قرب و كل سنه و انا بخير,الناس في الحفله كانوا مقضيينها تصوير,كل دقيقه صور صور,عشان الذكريات الحلوه و اللذي منه,انا مش فاكر اني اتصورت في الكليه في موقف مشابه غير مره واحده,و كنت بقول لنفسي ايه الهبل ده,فضا بعيد عنك,بس لما شفتهم النهارده في هندسه فهمت انهم بيعملوا كده عشان خلاص,حيفرجوا عنهم من السيرك الصغير للسيرك الكبير,و كل واحد محتاج شويه ذكريات للايام الجميله اللي قضاها مع ناس ممكن ميشوفهمش تاني,بالنسبه لي,لسالنا كتييييييييييير علي بال ما نفكر في الموضوع ده,يعني زي ما قلت,فضا بعيد عنك.
اديث بياف,عمال انزل ليها اغاني,اكتشفت ان الست دي رهيبه,مغنيه رهيبه,من احسن الحاجات اللي حصلتلي الشهرين اللي فاتوا اني بقيت بسمعها,صوتها فيه حشرجه لا تملك امامها الا انك تقول,الله يا ست.
الطلبه كلهم معترضين علي اننا حنخلص السنه دي اخر شهر 6,كل الناس فجأه بقي نفسها و مني عينها نخلص نص سبعه زي كل سنه,"مفيش وقت نذاكر,ياي فعلا كليه ياي,حرام عليهم كده بجد,عايزين نذاكر",نفس الناس دي كل سنه بتقول "ياي ياي,الكليه الشريره بتخلينا نخلص متأخر,كده مش بناخد اجازه",الناس بقت مدمنه تقريبا,و المذاكره و الامتحانات بقت كيف و مزاج,يعني لما تعوز تعاقب طالب,تحطه في اجازه اسبوعين,تلاقيه بتجيله اعراض انسحاب و يجري يدور علي كتاب يذاكر فيه,و لو ملقاش يقد بقي يهرش و يجيله هستيريا,عايز كتاب,عايز كتاب,و حياه ابوك كتاب,الحمد لله الكليه بقت ماسكه علينا ذله و محدش يقدر يفلفص و الا حيقطعوا عنه الجرعه اليوميه.
اخر ابريل,مكنتش متوقع ان اخر يوم في ابريل حقضيه و انا عايز انام,مجرد عايز انام,و كالعاده حفوق الساعه 3 فجرا,فاقضي ساعه اعوض فيها اللي فاتني طول اليوم,و اصحي تعبان,و هلم جرا,يبدأ مايو زي ما عدي ابريل,و اكتب بوست تاني علي اخر مايو,اوصف فيه قله النوم و قرف الامتحانات.
